106 статья. Ермакъ же, видя своихъ убиение и помощи ни откуду животу своему, бежа в стругъ свой и не можѣ скочити, бѣ одѣянъ двема царскими пансыри, стругъ же отплы отъ брѣга, и не дошедъ, утопѣ мѣсяца августа въ 6 день. Егда жѣ приемше протчие казаки во граде вѣсть, горко плакашася об немъ, бѣ бо велми мужьствѣнъ и разуменъ, и человѣченъ, и зраченъ, і всякоі мудрости доволенъ, плосколицъ, чернъ брадою і власы прикудрявъ, возрастъ средней, и плоскъ, плечистъ.
107 статья. Видевше оставшие казаки, яко наставника своего и зъ дружиною убиенныхъ, плакаша в разлучении; осташася всехъ 150 человѣкъ, и противъ бусурманскихъ силъ стоять не кемъ, а живяще помрутъ гладомъ; седоша в струги своя августа въ 15 день и погрѣбоша внизъ по Обѣ, і с воеводою, і по Иртышу, и по Собѣ и черезъ Камѣнь приидоша в Русь на свои жилища, градъ же оставиша пустъ.
108 статья. И видевъ се Кучюмовъ сынъ Алѣй, кочюя Абугиновыхъ городки, оставль же казаки градъ пустъ, пришедъ, вселися во граде Кашлыкѣ с вои своими. Услышавше про се, Сейдякъ князь Бѣкбулатовъ сынъ, яко Ермакъ убиенъ на перекопѣ своей и протчии бѣжаша в Русь, а сынъ Кучюмовъ Алѣй градъ заселъ, собрався з домашними вои и пришедъ во градъ і побѣдивъ Алѣя і воинство его, и кровь отца своего Бѣкбулата отмстилъ и приемъ отчину отцову и прѣбываше во градѣ.