|
http://expositions.nlr.ru/literature/drevrus/show_Manuscripts.php?i=2ADEC245-E1E7-4683-92C0-AB40B6C65988&v=&l=121
Пяти ради вин учится астрологиа.
Первое: ради древности, понеже Адам бе искуснейший астролог и наследницы его, пишет бо Иосиф Флавий, яко Сифовы сынове создаша два столпа, един каменный, другий же плинфяный, и на них написаша всю астрологию, та же и о Аврааме пишет.
Второе: ради достоинства, понеже предложение его есть небо, еже между всех есть первое величество и обиталище ангел Божиих.
3. Истинства ради, понеже предложение его есть непременное по своему естеству и движению есть непременное.
Четыре: сладости ради, понеже сладчайшая вещь есть зрети звезд красоту и благость. Сего ради и Платон глаголаше, яко сего ради человек очи имат, да небо зрит со звездами.
Пятое: пользы ради, понеже сила, мудрость и благость Божия познаваются и небесных телес величество, движение, красота и совершенство, есть же полезнейшая на брань и на земледельство, и на вся, понеже ей познавается времен пременение.
Разнствуются убо острология от астрономии, яко астрология учит о совершенстве звезд и их пользы, астрономия же учит о движении звезд.
Глаголет же острология сама о себе сице.
Первая и мудрая грамматика извитием осьми частей своих речеся. Вторая по той - красноречивая риторика, смыслом своея высоты уже предпоставися.
Третия - хитрословесная во ответех диалектика, в чине естествословия своего уже предпоказася. Сия убо три едина по единой сестры в чине составляемаго слова единомудрие имущая и друга друзей другии суть во своем их свойстве. Четвертая мудрости наука дивная и похвальная арифметика, мерилом и числом в фигурах своих уже приобъявися. Пятая же по сих, славная и высокогласная мусика, в шумех согласного гласа уже припредвозгласия. Шестая же есть еллином и скифом рачительная геометрия, мудромерною своею вервию уже предположися.
Ныне же по сих всех седьмая свободная мудрость, честная и высокая, сих сестра астрология, и ищущим моея высокия науки явлюся, иже мя хотят разумети, да познают мя, есмь бо последняя местом, первая же действом. От творца моего и Бога четвертый день сотворена есмь, сиречь солнце, луна и звезды вся, и поставима на тверди небесней. Людие же нарекоша мя астрология еллински, словенски же звездословие.
И тако Бог мой прехождение мое по планитам высоты небесныя по чину чреды коегождо аера учини, яко же в книзе своей шествием и действием являюся всяко.
Спафарий, Николай Гаврилович (молдавский и российский дипломат, путешественник, переводчик; 1636 - 1708)
|
